बिग्रल सन्हली

थारु भाषा कविता

उर्मिला गम्वा थारु(Urmila Gamwa Tharu)

सन्हली आस निक्रल
आप सन्हली आँखिमसे आँस नाहिँ
हिम्मट के मुठ्या बाहान
काैन समाज काैन गाउँ काैन घर
आस यी सक्कु चिजसे बगावत कैक निक्रल

ना सन्हलीक माठक सेँडुरा
जिन्गीभर आपन रहलिस
ना जिन्गी आपन कहल जस्ट हुईलिस
नेँग्टी घुम्टी ठ्यास लगैठीस
अइटीकी गाेस्या खाईल
आपन अंसम रहल लर्का खाईल
टाैनाेफे हेराे
हृडा चङ्गा कैक
आँखर हाेक न्याँगट
हँ सन्हली

आँखिम कजरा
ढेब्रम लाली
कामक्लाक निक्रढ्या ट फे कठ
निक्रल
भर्खरीक लाैली बन्साहान सन्हली हुँ

टैँहुँ सडडिन आँखिम आँस
उडास बैठस हुँ
यी समाज कठा
टैँ डेखाई परल हुँ राँर
मुहमा हाँसी नाँहि उडास
बाेलीम आँखर नाखी लरम
नै डेख्ना चहटा राँर हँ साकार

टबट कठुँ
सन्हली यी ट डुन्यनके
बयाल हाे
यी बयालम टैँ नामिल्जा
का ससुर्वा का माउँ
का जेठ्वा का डिउरा
टिँग्रल बैसबा सन्हली
जिन्गी आपन हाे
आपन बना
बैँस घुम्क नैअईठा सन्हली

यह घरम आजी
भाेँर्वा पेलैली हुँ
आजा डुईठाे लेहल हुँ
समयसे चलल् हुँ
ऊ ब्यालम
नारीशक्ति बनल
एक्काईसाैँ शताब्दीम
कसिक बनल यी सन्हली संस्कार हेराईल

यी लाैँर्या रह जन्यवाँ हाेगील
लाैँरा रहट् ट कबुना ठँर्या हुईट ?

टैँ राँर हुईल्या सन्हली
टैँ नैरट्याट
ट्वार गाेस्या कबुना राँर हुईन रह सन्हली
ना नारी रट्या ना पैट्या गारी
हाँ टबट कठुँ सन्हली
जिन्गी ट्वार हाे
आपन राजी खुसि नेंग सन्हली

ना सन्हली ना
टैनासुन हुँकन
सुन्ब्याट टैँफेन माटी बन्ब्या
हृडा फुट्ना गारि गरैहिँ
माठ लल्लैना गारी बर्सैहीँ
ग्वारम गर्ना वचन लगैहिँ
टैँ हुइट्या नारी
स्वतन्त्र रहल्या स्वतन्त्र राे
बल्गर बन्क नेँग सन्हली ।।