बैस ओ म्वार गोही

                                                                  (थारु भाषा कविता : उर्मिला गम्वा थारु )

अघट्यक पुर्न्याँ बाट सम्झठुँ

कसिन राहा रंगिट लक्टिक डिन

ओहो कसिन बैँस रह

सजना गैटी

गाला मर्टि मैगर लग्ना

गोही गोचनसे लभारी कर्ना

ऊ डिनफे का रह

घरघर जाक हाँक पर्ना

अहो गोही लुर फ्याँक जैनाबा 

चोलो हलि

कठ्वा पट्या करजैनाबा

छोट्क्यान बेगारी जैनाबा

खैकन्ड्रा टल्लोक मछ्छि घोँघी काहर जैनाबा

डस्या आईलागल

बर्घरेक घर नाच सिख जैनाबा

जाइ हलि

कटि गोही हुँकन गोहरैलक डिन

ऊ बैस फे जाट झट्कार लग्टिक

सम्झठुँट सिट्टर लागट

मैना गैटी बन्कस कट्लक 

टाटा बिन्लक

डस्याम घर पिरोर्लक 

माघक मघौटा नच्लक राट

आस फे जुरार लग्टिक लागट 

हेल्का डेल्या ठाँटी 

संग बिन्लक डिन काल जस्ट लागट

डुई डिन लगाक

कस्ला टीका छेडाई गैलक 

कोईलाबास बजारम बजार ख्याल गैलक

बल्ल बल्ल ठेँठ्वक गोन्या पाक

खुसि हुईलक

डग्रि भर हँस्टि अईलक 

गोही आस फे उह हाँसी हँस्नास लागट

गोही टुँहार संग

उह बैस आस खोज्नास लागट

गोही टुँहारसंग आसफे लैलैहिनास लागट

हृडम रहल मैयाँ म्वार गोहीक

हाँठम बा टेक्नी साहारा

ना घरसे डुर ना घरसे लग्घु

गोही कबुनी हुईल

भ्याँट टुहाँर म्वार

मै अईनु पछ्ला बुह्रान

टुँ रैगिलो अग्ला बुह्रान

आस फे हृडा जुर हुइठा

सम्झटी अघट्यक बैस ओ डिन गोही।।